თბილისში, მთელი ღამის განმავლობაში სპეცრაზმი მშვიდობიან დემოსტრანტებსა და მედიის წარმომადგენლებს ფიზიკურად უსწორდებოდა. საპროტესტო აქცია წიწაკის სპრეისა და წყლის ჭავლის გამოყენებით დაშალეს.
მედიაომბუდსმენის ინფორმაციით, აქციის დაშლისას დაშავებულია მინიმუმ 20 ჟურნალისტი და ოპერატორი. ორგანიზაციის მიერ გავრცელებულ ინფორმაციაში აღნიშნულია, რომ 28 და 29 ნოემბერს აქციაზე, სახელმწიფოს წარმომადგენლები მიზანიმიმართულად ძალადობდნენ ჟურნალისტებსა და ოპერატორებზე და ხელს უშლიდნენ მათ საქმიანობაში განხორციელებაში.
შინაგან საქმეთა სამინისტროს ცნობით, პარლამენტთან წუხელ ღამით განვითარებული მოვლენებისას, შინაგან საქმეთა სამინისტროს 32 თანამშრომელი დაშავდა.
პარლამენტთან გამართულ აქციაზე 43 პირია დაკავებული. როგორც შსს-ის მიერ გავრცელებულ ინფორმაციაშია ნათქვამი, 43-ვე პირი დაკავებულია სამართალდამცველთა მიერ პოლიციელის კანონიერი მოთხოვნისადმი დაუმორჩილებლობისა და წვრილმანი ხულიგნობისთვის ადმინისტრაციულ სამართალდარღვევათა კოდექსის 166 და 173-ე მუხლების შესაბამისად.
