სახელმწიფო აუდიტის სამსახურის ბოლო დასკვნის თანახმად, მუნიციპალიტეტის მერიის მიერ გაცემული სამშენებლო ნებართვები დანაშაულის ნიშნებს შეიცავს, ასევე, უკანონო მშენებლობებზე სათანადო რეაგირება არ ხდება.
“2021-23 წლებში ქობულეთის მუნიციპალიტეტის მერიის მიერ გაცემულია 242 სამშენებლო ნებართვა, მათ შორის, 214 შემთხვევაში ნაბართვა გაცემულია ახალ მშენებლობაზე, 11 შემთხვევაში − მშენებლობის ცვლილებაზე და 17 შემთხვევაში − შენობის დემონტაჟზე.
ამავე წლებში ზედამხედველობის სამსახურის მიერ გამოვლენილია უნებართვო მშენებლობის 30 შემთხვევა, რის გამოც მშენებლობის მწარმოებელი ფიზიკური თუ იურიდიული პირები დაჯარიმდნენ 93,000 ლარით, საიდანაც 2023 წლის 1ოქტომბრის მდგომარეობით გადახდილია 53,590 ლარი, ანუ ჯარიმის 57,6%,” – წერენ თავიანთ დასკვნაში აუდიტორები.
აუდიტორები ასევე, წერენ რომ შერჩევითი წესით შეისწავლეს 39 ობიექტის კანონიერება, რომლის შედეგადაც გამოვლინდა 4 უნებართვო მშენებლობა, რომელთან დაკავშირებით ზედამხედველობის სამსახურის მიერ მიღებულია დადგენილებები, მშენებელი პირების მიმართ საჯარიმო სანქციების დაკისრებისა და უკანონოდ აშენებული შენობების დემონტაჟის შესახებ, თუმცა აღნიშნული ღონისძიებები პრაქტიკულად არ განხორციელებულა.
კერძოდ, თამარ მეფის სანაპირო №52-ისა და №54-ის და დავით აღმაშენებლის გამზირის №279-ის მიმდებარედ, დაფიქსირდა კაფე ბარების უნებართვო მშენებლობები. სამივე შემთხვევაში მშენებლობა განხორციელებულია მუნიციპალიტეტის საკუთრებაში არსებულ მიწის ნაკვეთზე, რომლითაც აღნიშნული პირები სარგებლობდნენ მერიასთან გაფორმებული საიჯარო ხელშერკულების საფუძველზე.
აღნიშნულთან დაკავშირებით 2023 წლის ივლისში მუნიციპალიტეტის ზედამხედველობის სამსახურის მიერ მიღებულია დადგენილებები, მშენებელი პირების დაჯარიმებისა და უკანონოდ აშენებული შენობების დემონტაჟის შესახებ, თუმცა აუდიტორების შესწავლის პროცეში აღმოჩნდა, რომ შენობების დემონტაჟი არ იყო განხორციელებული.
“მერიის მიერ უკანონო მშენებლობების აღკვეთის მიზნით გატარებულმა ღონისძიებებმა ვერ უზრუნველყო უნებართვო მშენებლობების შეჩერება და სახელმწიფო საკუთრებაში არსებული მიწის ნაკვეთების უკანონო გამოყენება, რაც ქობულეთის ტერიტორიაზე მშენებლობების ზედამხედველობასთან დაკავშირებული შიდა კონტროლის სისტემის არსებით სისუსტეზე მიუთითებს,” – აცხადებენ აუდიტორები.
კიდევ რა დარღვევები გამოიკვეთა მუნიციპალიტეტის საქმიანობაში, ვრცლად ნახეთ ბმულზე.
