ახალ სასწავლო წელთან დაკავშირებით, აჭარის ექვსივე მუნიციპალიტეტის საჯარო და კერძო სკოლებში სასწავლო პროცესი დღეს ოფიციალურად დაიწყო.
წელს აჭარაში 5 658 პირველკლასელია რეგისტრირებული. რეგიონში არსებული 230 საჯარო და 25 კერძო სკოლის მოსწავლეთა საერთო რაოდენობა, სექტემბრის მონაცემებით, 72 907-ს შეადგენს.
მიმდინარე სასწავლო წელს რეგიონში რომელ საჯარო სკოლას არ ეყოლება პირველკლასელი? კითხვაზე, აჭარის განათლების სამინისტროს ამ ეტაპზე, ზუსტი ინფორმაცია არ აქვს, რადგან მოსწავლეთა მობილობის პროცესი 1 ოქტომბრამდე მიმდინარეობს.
როგორი ვითარებაა მიმდინარე სასწავლო წელს აჭარის სხვადასხვა მუნიციპალიტეტის საჯარო და კერძო სკოლებში? ამ საკითხზე „აჭარა თაიმსი“ რესურსცენტრების ხელმძღვანელებს დაუკავშირდა.
ბათუმის რესურსცენტრის ხელმძღვანელის, გოჩა დავითაძის ინფორმაციით, ბათუმის 28 საჯარო და 16 კერძო სკოლაში 46 380 მოსწავლეა რეგისტრირებული. წელს სკოლებში პირველკლასელთა საერთო რაოდენობამ 3 762 შეადგინა.
ქობულეთის მუნიციპალიტეტში მიმდინარე სასწავლო წელს პირველკლასელები არ ეყოლებათ სოფელ ზენითის საჯარო და ზედა კვირიკეს საბაზო სკოლას. რესურსცენტრის ხელმძღვანელის, მადონა გოგიტიძის ინფორმაციით, მუნიციპალიტეტის 46 საჯარო და 3 კერძო სკოლაში 12 700 მოსწავლე ირიცხება. რაც შეეხება პირველკლასელთა რაოდენობას, წელს დაახლოებით 900 მოსწავლე დარეგისტრირდა.
ხულოს მუნიციპალიტეტის რესურსცენტრის ხელმძღვანელის, რამაზ გელაძის ინფორმაციით, წელს ხულოში 1 931 მოსწავლეა რეგისტრირებული, მათ შორის 110 პირველკლასელია. მუნიციპალიტეტში 49 საჯარო და ერთი კერძო სკოლაა. მუნიციპალიტეტში რამდენიმე სკოლაა, სადაც მიმდინარე წელს პირველკლასელი მოსწავლე არ ეყოლებათ, თუმცა მონაცემები ზუსტდება.
„აჭარა თაიმსი“ ხელვაჩაურის, ქედისა და შუახევის მუნიციპალიტეტების რესურსცენტრების ხელმძღვანელებსაც დაუკავშირდა. მიუხედავად დაპირებისა, სამივე საჯარო უწყების ხელმძღვანელი მედიასთან კომენტარს ამ დრომდე არ აკეთებს და ჩვენს სატელეფონო ზარებსაც არ პასუხობს.
