„საერთაშორისო გამჭვირვალობა – საქართველოს“ კვლევის მიხედვით, ბათუმში 2024-2026 წლებში გზების რეაბილიტაციის რამდენიმე მსხვილ ტენდერში კონკურენციის ხელოვნური შეზღუდვის ნიშნები იკვეთება, რის შედეგადაც მრავალმილიონიანი სახელმწიფო შესყიდვები კომპანიების შეზღუდულ წრეს შორის ნაწილდებოდა.
ორგანიზაციის ცნობით, საუბარია ბათუმის მერიის ა(ა)იპ „საქალაქო ინფრასტრუქტურისა და კეთილმოწყობის სამმართველოს“ მიერ გამოცხადებულ ტენდერებზე, სადაც ერთ-ერთ ძირითად პირობად განისაზღვრა, რომ პრეტენდენტ კომპანიას ობიექტიდან 30 კილომეტრის რადიუსში უნდა ჰქონოდა ასფალტის ქარხანა ან ასეთი ქარხნიდან მიწოდების შეთანხმება.
კვლევის ავტორების შეფასებით, აღნიშნულმა მოთხოვნამ ტენდერებში მონაწილეობის შესაძლებლობა მნიშვნელოვნად შეამცირა და ბაზარზე კონკურენციის შეზღუდვის მექანიზმად იქცა.
ორგანიზაციის ინფორმაციით, მიმდინარე წლის მარტში გამოცხადებული ერთ-ერთი ტენდერის შედეგად შპს „გზამ“ ბათუმში საგზაო სამუშაოების შესრულების მიზნით 29.2 მილიონი ლარის ხელშეკრულება მიიღო. კვლევაში აღნიშნულია, რომ კომპანია ტენდერში ერთადერთი მონაწილე იყო.
„საერთაშორისო გამჭვირვალობა – საქართველოს“ მონაცემებით, შპს „გზის“ 100%-იანი წილის მფლობელი მოქმედი პარლამენტარი გიორგი ჭყონიაა. ამავე კვლევის მიხედვით, კომპანიას მთლიანობაში 1.3 მილიარდ ლარზე მეტი ღირებულების სახელმწიფო ტენდერები აქვს მოგებული.
ორგანიზაციის შეფასებით, 2024-2026 წლებში ბათუმში მსგავსი პირობებით გამოცხადებული სულ ხუთი მსხვილი ტენდერი გამოვლინდა, რომელთა საერთო ღირებულება 70 მილიონ ლარს აღემატება. კვლევის მიხედვით, ამ ტენდერებში მხოლოდ სამი კომპანია მონაწილეობდა და გამარჯვებულებიც მონაცვლეობით ნაწილდებოდნენ.
ანგარიშში ასევე ყურადღება გამახვილებულია პოლიტიკური შემოწირულობებისა და ტენდერების ქრონოლოგიურ თანხვედრაზე. ორგანიზაციის ინფორმაციით, 29-მილიონიან ხელშეკრულებამდე რამდენიმე დღით ადრე შპს „გზასთან“ დაკავშირებულმა პირებმა მმართველ პარტიას ჯამში 120 ათასი ლარი შესწირეს.
„საერთაშორისო გამჭვირვალობა – საქართველო“ აღნიშნავს, რომ ეს გარემოებები თავისთავად დანაშაულის პირდაპირ მტკიცებულებას არ წარმოადგენს, თუმცა ინტერესთა კონფლიქტისა და შესაძლო სისტემური კორუფციის ნიშნებს შეიცავს.
ორგანიზაცია მიიჩნევს, რომ აღნიშნული გარემოებებით შესაბამისი საგამოძიებო უწყებები უნდა დაინტერესდნენ და უზრუნველყონ ეფექტიანი და მიუკერძოებელი გამოძიება.
დაკავშირებული თემები ⇓
იუსტიციის სამინისტრომ ფართი „ოცნების” შემწირველი გიორგი ჭყონიას კომპანიისგან იქირავა
„ოცნების“ დელეგატები აჭარიდან – რა ვიცით კანდიდატებზე
