შინაგან საქმეთა სამინისტროს ინფორმაციით, ბათუმში 1988 წელს დაბადებული უცხო ქვეყნის მოქალაქე მ.ს. ოჯახის წევრის მიმართ დამამძიმებელ გარემოებებში ჩადენილი განზრახ მკვლელობის მცდელობის ბრალდებით დააკავეს.
უწყების ცნობით, გამოძიებით დადგინდა, რომ ბრალდებულმა ბათუმში, მასთან არარეგისტრირებულ ქორწინებაში მყოფ პირს – 1991 წელს დაბადებულ უცხო ქვეყნის მოქალაქე ქ.ი.-ს – ცივი იარაღის გამოყენებით გულ-მკერდის არეში ჭრილობები მიაყენა.
დაჭრილი კაცი შესაბამისი სამედიცინო დახმარების გაწევის მიზნით სამედიცინო დაწესებულებაში გადაიყვანეს. ექიმების შეფასებით, მისი ჯანმრთელობის მდგომარეობა სტაბილურია.
პოლიციამ მ.ს. ბრალდებულის სახით ცხელ კვალზე დააკავა. სამართალდამცველებმა დანაშაულის ჩადენის იარაღი – დანა – ნივთმტკიცებად ამოიღეს.
გამოძიება სისხლის სამართლის კოდექსის 19-109-ე მუხლით მიმდინარეობს, რაც 16-დან 20 წლამდე ან უვადო თავისუფლების აღკვეთას ითვალისწინებს.
