საქართველოს ახალგაზრდა იურისტთა ასოციაცია აცხადებს, რომ საქართველო 2026 წლის 17 მაისს ლგბტქი ადამიანების უფლებების უგულებელყოფის, დისკრიმინაციული კანონმდებლობისა და ხელისუფლების მხრიდან სიძულვილის წახალისების ფონზე ხვდება.
ორგანიზაციის შეფასებით, ლგბტქი თემი განსაკუთრებით 2024 წლიდან გახდა სახელისუფლებო პროპაგანდის სამიზნე. საიას განცხადებით, მიუხედავად იმისა, რომ თემის წარმომადგენლებს მანამდეც სისტემური უთანასწორობისა და დისკრიმინაციის პირობებში უწევდათ ცხოვრება, ხელისუფლებამ 2024 წლიდან პროაქტიულად დაიწყო „მტრის ხატის“ შექმნა დისკრიმინაციული კანონპროექტებისა და სიძულვილის შემცველი რიტორიკის გამოყენებით.
საია ყურადღებას ამახვილებს 2024 წლის სექტემბერში მიღებულ საკანონმდებლო პაკეტზე და აცხადებს, რომ აღნიშნული ცვლილებები ზღუდავს ფუნდამენტურ უფლებებს, მათ შორის გამოხატვის თავისუფლებას, კრძალავს ტრანსსპეციფიკურ ჯანდაცვას და ზღუდავს პირადი და ოჯახური ცხოვრების თავისუფლებას. ორგანიზაციის შეფასებით, ეს კანონები ეწინააღმდეგება ადამიანის უფლებათა ევროპული სასამართლოს პრაქტიკას, რის გამოც ევროპის საბჭოს მინისტრთა კომიტეტმა საქართველოს მათი გაუქმებისკენ მოუწოდა.
განცხადებაში აღნიშნულია, რომ ხელისუფლება აღნიშნულ კანონმდებლობას ოჯახებისა და ბავშვების დაცვის მოტივით ხსნის, თუმცა რეალურად, საიას შეფასებით, ეს პოლიტიკა ბავშვებს ბულინგისა და ძალადობის მიმართ უფრო მოწყვლადს ხდის. ორგანიზაცია ამ კონტექსტში გაეროს ბავშვის უფლებების კომიტეტის 2024 წლის შეფასებებსაც იხსენებს, სადაც საქართველოს ჰომოფობიური და ტრანსფობიური საკანონმდებლო ინიციატივების შეჩერებისკენ მოუწოდეს.
საიას განცხადებით, ანტიგენდერული რიტორიკა უარყოფითად აისახება ქალთა უფლებრივ მდგომარეობაზეც და ხელს უწყობს ისეთი სოციალური გარემოს ჩამოყალიბებას, სადაც გენდერული უთანასწორობა და ძალადობა უფრო მეტად მყარდება.
ორგანიზაცია მიიჩნევს, რომ ლგბტქი თემზე გაძლიერებული თავდასხმა საქართველოში ავტორიტარიზმის გაძლიერებისა და სხვა რეპრესიული კანონების მიღების პარალელურად მიმდინარეობს. საიას შეფასებით, ჰომოფობიისა და ტრანსფობიის გაძლიერება ხელისუფლებისთვის კრიტიკისგან ყურადღების გადატანის საშუალებად გამოიყენება და საბოლოოდ, დემოკრატიასა და ადამიანის უფლებებს აზიანებს.
