ბათუმის საკრებულო დღევანდელ სხდომაზე იმსჯელებს დადგენილების პროექტზე, რომელიც ბათუმის ბულვარში ელექტროტრანსპორტით გადაადგილების წესის დროებით შეცვლას ითვალისწინებს.
საუბარია 2019 წლის 5 მარტის №4 დადგენილების ნაწილის მოქმედების შეჩერებაზე, რომელიც ბულვარში, პარკებსა და სკვერებში მოტოციკლებით, კვადროციკლებითა და ელექტრომობილებით გადაადგილებას არეგულირებს.
როგორც განმარტებით ბარათშია აღნიშნული, ბათუმის მერიას შესაბამისი წინადადებით „ბათუმის ბულვარმა“ მიმართა. უწყების ინფორმაციით, ბოლო წლებში განსაკუთრებულად გაიზარდა ე.წ. ელექტროთვითმგორავების, ორბორბლიანი და სამბორბლიანი ელექტროსკუტერების გამოყენება და მოთხოვნა.
პროექტის მიხედვით, 2027 წლის 1 იანვრამდე ბათუმის ბულვარში ველობილიკზე ორბორბლიანი ელექტრო თვითმგორავებით გადაადგილება უნდა დაიშვას. ასევე, ახალი ბულვარიდან დელფინარიუმის მონაკვეთამდე ველობილიკზე შესაძლებელი იქნება მხოლოდ სამბორბლიანი ელექტრო სკუტერებით გადაადგილება.
დოკუმენტის ავტორები განმარტავენ, რომ ცვლილების მიზანია დამსვენებლებისა და ტურისტებისთვის თანამედროვე მოთხოვნებზე მორგებული პირობების შექმნა.
ბულვარის ტერიტორიაზე ელექტროსკუტერებითა და მსგავსი ტრანსპორტით მომუშავე თვითდასაქმებულებს საქმიანობა რამდენიმე თვის განმავლობაში აკრძალული ჰქონდათ. მათ ნაწილს ტრანსპორტიც ჩამოართვეს, რის გამოც თვითდასაქმებულები აჭარის მთავრობის ადმინისტრაციულ შენობასთან საპროტესტო აქციებს მართავდნენ.
დაკავშირებული თემები ⇓
ელექტრო სკუტერებისა და მოპედების მფლობელების პროტესტი და მოთხოვნა
