24 მაისიდან აჭარაში ყოველდღიური საპროტესტო აქციები იწყება, ამის შესახებ აჭარის მთავრობის სახლთან სხვადასხვა სოციალური პრობლემის მქონე ადამიანებმა განაცხადეს.
იპოთეკით, ავტობანისა და მეწყრის შედეგად დაწარალებულებმა, ასევე, სოციალურად დაუცველებმა და უსახლკაროებმა დღეს საპროტესტო აქცია გამართეს და თორნიკე რიჟვაძესთან შეხვედრა ითხოვეს. აჭარის მთავრობის თავმჯდომარე მათ არ შეხვდა.
მოგვიანებით აქციის მონაწილეებმა რუსთაველის ქუჩა გადაკეტეს, რა დროსაც პოლიციასა და აქციის მონაწილეებს შორის დაპირისპირება მოხდა. ინციდენტისას ერთი პირი პოლიციელისთვის წინააღმდეგობის გაწევის ბრალდებით დააკავეს.
თამაზ ბაკურიძის ინფორმაციით, დაკავებული შშმ პირია. უფლებადამცველის თქმით, აღნიშნული პირი პოლიციას მას შემდეგ დაუპირისპირდა, როდესაც დაინახა რომ მის დედაზე პოლიციელი ფიზიკურად ძალადობდა.
“დღევანდელი აქცია არის გამაფრთხილებელი. დავაანონსეთ მასშტაბური აქცია, თუმცა მთავრობას მანამდე შეუძლია ხალხთან შეხვედრა,” – განაცხადა თამაზ ბაკურიძემ აქციაზე.
“ჩვენ ჩამოვედით სამეგრელოდან, არ აქვს მნიშვნელობა სამართლიანობისთვის სად ვიბრძოლებთ. როგორ შეიძლება ადამიანი იყოს უსახლკარო? ეს დანაშაულია! 24 მაისიდან აჭარასა და სამეგრელოში დაიწყება საპროტესტო აქციები. დღეს თუ ცოტანი ვართ, შემდეგში მთელი სამეგრელო ჩამოვა აქ და იქნება ბრძოლის საერთო ველი. არავინ უნდა იყოს უსახლკაროდ,” – განაცხადა აქციაზე მყოფმა ერთ-ერთმა პირმა.
