ქობულეთის საჯარო, საბავშვო ბაღებში სათამაშოების შეძენას მშობლებს სთხოვენ, რის გამოც ისინი ფული გროვდება, ამის შესახებ ინფორმაცია მშობლებმა ანონიმურობის დაცვით მოგვაწოდეს. მათი თქმით, პედაგოგებისა და ადმინისტრაციის მხრიდან პირდაპირი დავალება გაიცა და 50 ლარის ფარგლებში თანხას თითოეულ ბაღში, ერთი მშობელი აგროვებს.
ინფორმაციის დაზუსტებით მიზნით „აჭარა თაიმსი“ რამდენიმე საბავშვო ბაღის გამგეს დაუკავშირდა. ისინი თანხის შეგროვების ფაქტს კატეგორიულად უარყოფენ, თუმცა აღნიშნავენ, რომ მშობლებს ძველი სათამაშოების მიტანას მართლაც სთხოვენ, რადგან დაწესებულებას საკმარისი რაოდენობა არ გააჩნია.
ირკვევა, რომ ქობულეთის მერიის საბავშვო ბაღების გაერთიანებას სკოლამდელი დაწესებულებებისთვის სათამაშოები ბოლო რამდენიმე წელია არ შეუძენია, ამის მიზეზად გამგეები ბიუჯეტის სიმწირეს ასახელებენ.
„ფულთან რომაა დაკავშირებული ისეთი სათამაშოს მოტანას არ ვეუბნებით. მეორეული სათამაშო, რომელიც არ სჭირდება მშობელს მოაქვს. ფულის აკრეფა მათი ინიციატივაა და ჩვენ მაგ საკითხში არ ვერევით. სათამაშოები რამდენიმე წელია არ შეგვიძენია, მაგრამ ეს იმას არ ნიშნავს, რომ არ გვაქვს. თუ ვინმე სპონსორობას გამიწევს მადლობელი დავრჩები. ჩვენი მეთოდიკა მშობელთა ჩართულობაზეა დაფუძნებული, რაც იმას გულისხმობს რომ მშობლები დავალების გარეშე, თავისი ნებით, ხედავენ საჭიროებებს. მეორეული მასალა უფრო მოაქვთ, ვიდრე ახალი და ძვირადღირებული. გაერთიანებას ვთხოვეთ ახალი სათამაშოების შეძენა, მაგრამ არაა საკმარისი ბიუჯეტი, ჩვენ გვესმის მათი,“ – აღნიშნა ჩვენთან საუბარში ქობულეთის მეოთხე საბავშვო ბაღის გამგემ, ციური ჯინჭარაძემ.
საბავშვო ბაღში თანხის შეგროვების ფაქტს კატეგორიულად უარყოფს პირველი საბავშვო ბაღის გამგეც. გიუზელ ნიჟარაძემ „აჭარა თაიმს“ იმ მშობლების ვინაობის გამხელა მოსთხოვა, ვინც აღნიშნული ინფორმაცია მოგვაწოდა.
„მართლა მოსთხოვეს მშობლებს თანხა? არ ვიცოდი ნამდვილად. აბა დამისახელეთ ჯგუფი და მშობლები ვინც ეს ინფორმაცია მოგაწოდათ. აუცილებლად გავარკვევ ამ ყველაფერს. შეიძლება ყველაფერი საკმარისი არაა და მშობელმა მისი ინიციატივით მოიტანოს რამე, თორემ ჩვენგან მითითება არ ხდება. თუ ჩემს გარეშე რამეს აკეთებენ აუცილებლად მოვიკითხავ. არამგონია ჩემზე უკეთ თქვენ გაარკვიოთ ამბავი, ამიტომ მშობლელი მოვიდეს ჩემთან და მომაწოდოს ინფორმაცია,“ – განაცხადა პირველი საბავშვო ბაღის გამგემ, გიუზელ ნიჟარაძემ ჩვენთან საუბრისას.
„რომელი მშობელი ამბობს ამას, მობრძანდეს და დაგვიპირისპირდეს“ – ინფორმაციის წყაროს დასახელება მოგვთხოვეს ქობულეთის მეორე საბავშვო ბაღშიც.
„ჩვენ ეს არასოდეს გაგვიკეთებია, ძირითადად მხოლოდ მეორეულ სათამაშოებს ვითხოვთ. მე მჯერა ჩემი მასწავლებლების, ისინი მშობლებს არაფერს მოსთხოვენ. რომელი მშობელი ამბობს ამას? მობრძანდეს და დაგვიპირისპირდეს. ახალი სათამაშოები გაერთიანებას იშვიათად მოაქვს, მაგრამ იმ რაოდენობის არაა, რომ ყველასთვის საკმარისი იყოს. ვეუბნებით და მათაც იციან, მაგრამ რა საშუალებაცაა იმის მიხედვით არის. ბაღების გაერთიანება ძალიან ზრუნავს ჩვენზე, პრეტენზია არ გაგვაჩნია,“ – თქვა ჩვენთან საუბრისას მეორე ბაღის გამგემ, გუგული ართმელაძემ.
რატომ არ ყიდულობს ქობულეთის ბაღების გაერთიანება აღსაზრდელებისთვის სათამაშოებს და რატომ სთხოვენ მშობლებს თანხის შეგროვებას – „აჭარა თაიმსი“ კითხვებით ქობულეთის მერიას დაუკავშირდა. საკითხზე უწყებაში წერილობითი განმარტება გაკეთდა.
“ბაღების მხრიდან, თანხის აკრეფის ფაქტს, შემდგომში სათამაშოების ყიდვის მიზნით მერია კატეგორიულად გამორიცხავს. მსგავს შემთხვევას ადგილი არ ჰქონია. ქობულეთის მერიის მხრიდან ბოლო წლებში საბავშვო ბაღების მოწესრიგება/კეთილმოწყობა აქტიურად ხორციელდება. მომავალი წლის ბიუჯეტში უკვე მოხდება გათვალისწინება და აღსაზრდელებისთვის სათამაშოების შეძენა,” – განმარტეს ქობულეთის მერიაში.
