ბათუმის საერთაშორისო კინოფესტივალი (BIAFF) წელს 12-17 დეკემბერს ბათუმში კინომოყვარულებს ექსკლუზიურ კინოკვირეულს შესთავაზებს.
ფესტივალი გაიმართება განსხვავებულ ფორმატში – საკონკურსო პროგრამისა და ჟიურის გარეშე.
ორგანიზატორთა განმარტებით, ბიუჯეტის შეზღუდვების გამო წელს ფესტივალი კონკურსის ნაცვლად მხოლოდ კინოჩვენებებით წარდგება, თუმცა პროგრამა იქნება გამორჩეულად მრავალფეროვანი.
BIAFF 2025-ის ფარგლებში მაყურებლებს საშუალება ექნებათ ნახონ როგორც სრულმეტრაჟიანი, ისე მოკლემეტრაჟიანი ფილმების კოლექცია, რომლებიც ბოლო წლის განმავლობაში სხვადასხვა საერთაშორისო ფესტივალზე – კანის, ვენეციის, ბერლინალეს, სანადენსის, ტორონტოს, კარლოვი ვარისა და ლოკარნოს კინოფორუმებზე – იყვნენ წარმოდგენილი.
წელს ჟიურის ნაცვლად ფილმების შეფასებაში თავად მაყურებლები ჩაერთვებიან – კინომოყვარულებს შესაძლებლობა ექნებათ, დააფასონ ნაჩვენები ფილმები და თავად გამოავლინონ აუდიტორიის პრიზის მფლობელი.
კინოჩვენებები გაიმართება ბათუმის CAVEA Grand Mall-ის კინოთეატრში, ასევე – ბათუმის ხელოვნების უნივერსიტეტის მცირე დარბაზში.
ფილმების სია, სეანსების განრიგი და დამატებითი ინფორმაცია ეტაპობრივად გამოქვეყნდება BIAFF-ის ოფიციალურ ვებსაიტსა და ფესტივალის ფეისბუქგვერდზე.
ორგანიზატორები აღნიშნავენ, რომ მომავალ წელს BIAFF დაბრუნდება ტრადიციულ ფორმატში და ფესტივალის საიუბილეო გამოცემა განსაკუთრებულად საინტერესო იქნება.
მანამდე კი მაყურებელს ეძლევა შესაძლებლობა, არ გამოტოვოს BIAFF 2025-ის ექსკლუზიური “Best of” კინოკოლექცია – საუკეთესო ნამუშევრები 20 სხვადასხვა ქვეყნიდან, მსოფლიო კინოფესტივალების პროგრამებიდან.
