ბათუმში სხვადასხვა სოციალური პრობლემის მქონე მოქალაქეებმა ერთობლივი საპროტესტო აქცია გამართეს. პროტესტში მონაწილეობდნენ უსახლკარო ოჯახები, ჩამორთმეული მიწების მეპატრონეები, იპოთეკითა და საბანკო დავალიანებებით დაზარალებულები, ასევე ბათუმის ბულვარში თვითდასაქმებულები და დაუსრულებელი მშენებლობებით დაზარალებული პირები.
აქციის მონაწილეები თავდაპირველად ანბანის კოშკთან შეიკრიბნენ, რის შემდეგაც მსვლელობით აჭარის მთავრობის ადმინისტრაციასთან გადაინაცვლეს. მსვლელობისას ისინი სკანდირებდნენ საკუთარ მოთხოვნებს და შესაბამისი უწყებებისგან სწრაფ რეაგირებას ითხოვდნენ.
აჭარის მთავრობასთან შეკრებილებს, მიუხედავად რამდენიმე წუთიანი ლოდინისა, ხელისუფლების წარმომადგენლები არ შეხვედრიან. ადგილზე მობილიზებულმა პოლიციამ აქციის მონაწილეებს გზის გათავისუფლებისკენ მოუწოდა და პროტესტის ტროტუარზე გაგრძელება ურჩია, თუმცა შეკრებილთა სიმრავლის გამო ქუჩის გათავისუფლება ვერ მოხერხდა.
შემდეგ მოქალაქეებმა მსვლელობა „აჭარის ტელევიზიის“ შენობისკენ გააგრძელეს, სადაც მათი პრობლემების გაშუქება მოითხოვეს. ადგილზე ისინი უფლებადამცველთან, თამაზ ბაკურიძესთან ერთად რამდენიმე წუთით შეჩერდნენ და მაუწყებელს ყურადღებისკენ მოუწოდეს.
შემდეგ პროტესტის მონაწილეებმა მსვლელობით ბათუმის მერიასთან გადაინაცვლეს, სადაც თვითმმართველობის შენობის ყველა შესასვლელი, მათ შორის ეზოს ჭიშკრებიც დაკეტილი დახვდათ. ადგილზე ისმოდა შეძახილები – „გამოდი, მშიშარა“, რომლითაც შეკრებილები ბათუმის მერს, გიორგი ცინცაძეს მიმართავდნენ და მისი გადადგომა მოთხოვეს. ტერიტორიაზე რამდენიმე წუთით დაძაბულობა და სიტყვიერი დაპირისპირება იყო, თუმცა მერი აქციის მონაწილეებს არ შეხვედრია.
მოგვიანებით მოქალაქეები კვლავ აჭარის მთავრობის ადმინისტრაციასთან დაბრუნდნენ, თუმცა არც იქ გამოჩენილა მათთან სასაუბროდ ოფიციალური პირი. საბოლოოდ აქცია დაიშალა, თუმცა განაცხადეს, რომ პროტესტს 15 მაისს კვლავ განაახლებენ. მათ ასევე მოუწოდეს აჭარის მთავრობის ხელმეორედ დანიშნულ თავმჯდომარეს, ზურაბ პატარაძეს, დაინტერესდეს მათი პრობლემებით და რეაგირება მოახდინოს.
დაკავშირებული თემები ⇓
ბათუმში მიუსაფარი ცხოველების დაცვის მოთხოვნით აქცია გაიმართა
ზურაბ პატარაძე აჭარის მთავრობის თავმჯდომარედ დაამტკიცეს
