ბათუმში მოქმედი სამშენებლო კომპანიის ორი ხელმძღვანელი დიდი ოდენობით თანხის ჯგუფურად, თაღლითურად დაუფლების ბრალდებით დააკავეს. ინფორმაციას შინაგან საქმეთა სამინისტრო ავრცელებს.
უწყების ცნობით, გამოძიებით დადგინდა, რომ წარსულში ნასამართლევი პირები მოქალაქეებს ბინების საკუთრებაში გადაცემას ჰპირდებოდნენ და სანაცვლოდ დიდი ოდენობით თანხას ართმევდნენ.
სამინისტროს ინფორმაციით, ბრალდებულებმა მყიდველებს ბინები საკუთრებაში არ დაურეგისტრირეს და ფართები მხოლოდ ფაქტობრივ მფლობელობაში გადასცეს. მოქალაქეების მიერ ბინების საკუთარი ხარჯებით გარემონტების შემდეგ კი, ბრალდებულებმა აღნიშნული ფართები დამატებითი თანხის მიღების მიზნით სხვა პირებზე გაასხვისეს.
შსს-ის ცნობით, აღნიშნული სქემით ბრალდებულები მოქალაქეებს მოტყუებით დაეუფლნენ 190 502 აშშ დოლარსა და 42 600 ლარს.
ორივე პირი პოლიციამ მოსამართლის განჩინების საფუძველზე დააკავა.
გამოძიება საქართველოს სისხლის სამართლის კოდექსის 180-ე მუხლის მე-2 და მე-3 ნაწილებით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.
