აჭარის მთავრობის სახლთან, საფრანგეთში მოკლული მარად სურმანიძის ოჯახის წევრებმა და ახლობლებმა საპროტესტო აქცია გამართეს. ისინი თორნიკე რიჟვაძეს დახმარებას სთხოვენ. კერძოდ, მათი მოთხოვნაა ცხედრის საქართველოში გადმოსვენების პროცესში მთავრობა ჩაერთოს.
აქციაზე მოკლულის ძმამ განაცხადა, რომ საფრანგეთში ჩასვლის მიუხედავად, მისი ძმის ცხედრის სამყოფელის შესახებ ვერაფერი გაიგო, მათ შორის ინფორმაცია ვერც საელჩოსგან მიიღო. ოჯახისთვის ასევე, უცნობია სად არიან მარად სურმანიძის არასრულწლოვანი შვილები.
“საფრანგეთში ჩავედი, საელჩოს მივაკითხე, მაგრამ მათგან ვერაფერი გავიგე, უშედეგოდ მალოდინეს იქ. შემდეგ გადმოსვენებას შემპირდნენ, თუმცა მას შემდეგ სამი თვე გავიდა. რა ხდება არ ვიცი, საერთოდ არანაირი ინფორმაცია გაგვაჩნია,” – განაცხადა “აჭარა თაიმსთან” საუბრისას მოკლულუს ძმამ, მამუკა სურმანიძემ.
“ცხედარი სამი თვეა პროზექტურაშია დასვენებული. ვითხოვთ ყურადღებას გადმოსვენებაში მთავრობის დახმარებას. არ ვიცით, რა პირობებში არიან ბავშვები. მხოლოდ ის ვიცით, რომ თავშესაფარში არიან გადაყვანილი. მკვლელობა სამი თვის წინ მოხდა. ფაქტზე მისი მეუღლეა დაკავებული. მთავარი მოთხოვნაა, სამი თვის წინ მოკლული ჩემი დისშვილი დროულად გადმოასვენონ. მარადის ოჯახი, საფრანგეთში ერთ-ერთი შვილის სამკურნალოდ იყო წასული. დაახლოებით ორი წელი ემიგრაციაში იყვნენ. ჩვენთვის უცნობია, რა მიზეზით მოკლა ცოლმა”, – აცხადებს ოჯახის ახლობელი.
ინფორმაციისთვის: ფრანგული მედიის ცნობით, 2023 წლის 17 დეკემბერს გვიან ღამით მცირეწლოვანმა ბავშვებმა მეზობელს დაუკაკუნეს და უთხრეს, რომ მათ მშობლებს შორის „დიდი ჩხუბი“ იყო, რის შემდეგაც მეზობელი ქალი მათ ბინაში შევიდა და ძირს მწოლიარე კაცი დაინახა, რომელიც არ სუნთქავდა. მეზობელმა პოლიცია გამოიძახა. სამართალდამცველებს ახალგაზრდა კაცი უკვე გარდაცვლილი დახვდათ. გამოძიებით დადგინდა, რომ იგი გაგუდული იყო. მარად სურმანიძის მკვლელობის ბრალდებით მეუღლეა დაკავებული.
