საქართველოს ახალგაზრდა იურისტთა ასოციაცია-მ ადამიანის უფლებათა ევროპულ სასამართლოში მზია ამაღლობელის სახელით მესამე საჩივარი წარადგინა, რომელიც 2025 წლის 12 იანვარს მისი დაკავებისას განხორციელებულ სავარაუდო არასათანადო მოპყრობას ეხება.
ორგანიზაციის ინფორმაციით, სტრასბურგის სასამართლო უკვე განიხილავს ამაღლობელის ორ საქმეს. პირველი საქმე უკავშირდება მის მიმართ აღკვეთის ღონისძიების სახით პატიმრობის გამოყენებას, ხოლო მეორე – ადმინისტრაციულ დაკავებასა და მასთან დაკავშირებულ შესაძლო დარღვევებს.
საიას ცნობით, 2025 წლის 12 იანვარს, ღამის საათებში, აჭარის პოლიციის დეპარტამენტის შესასვლელთან ამაღლობელი პოლიციამ ძალის გამოყენებით დააკავა, რის შედეგადაც მან ფიზიკური დაზიანებები მიიღო. ორგანიზაციის განცხადებით, დეპარტამენტის ეზოში მას სიტყვიერ შეურაცხყოფას აყენებდა ირაკლი დგებუაძე, რომელიც, მათი ინფორმაციით, ფიზიკური ძალადობის გამოყენებასაც ცდილობდა, თუმცა თანამშრომლებმა შეაკავეს.
საიას ინფორმაციით, არასათანადო მოპყრობა პოლიციის შენობაშიც გაგრძელდა. ამაღლობელს რამდენიმე საათის განმავლობაში არ მისცეს ადვოკატის მომსახურებით სარგებლობის შესაძლებლობა, ჩხრეკა ადვოკატის გარეშე ჩაუტარდა, ხოლო ხელბორკილები ზურგს უკან დაადეს.
სტრასბურგის სასამართლოში წარდგენილი საჩივრით საია ამტკიცებს, რომ ამაღლობელის შემთხვევაში დაირღვა ადამიანის უფლებათა ევროპული კონვენციით გათვალისწინებული რამდენიმე ფუნდამენტური უფლება, მათ შორის: წამების, არაადამიანური ან დამამცირებელი მოპყრობის აკრძალვა, პირადი ცხოვრების ხელშეუხებლობა და სამართლებრივი დაცვის ეფექტიანი საშუალების უფლება.
ორგანიზაციის შეფასებით, სახელმწიფომ ასევე ვერ უზრუნველყო შესაძლო არასათანადო მოპყრობის დამოუკიდებელი და ეფექტიანი გამოძიება. მათივე თქმით, გამოძიებამ არ შეისწავლა ყველა ვიდეოჩანაწერი, არ გამოიკითხა ყველა შესაძლო მოწმე და ამაღლობელი დღემდე არ არის დაზარალებულად ცნობილი.
საია აცხადებს, რომ ამაღლობელის უფლებების დაცვას სტრასბურგის სასამართლოში გააგრძელებს და საქმის მიმდინარეობის შესახებ საზოგადოებას დამატებით ინფორმაციას მიაწვდის.
მზია ამაღლობელის სიტყვა ევროპარლამენტში
მზია ამაღლობელს 2 წლით თავისუფლების აღკვეთა მიესაჯა — სასამართლომ ბრალი გადაუკვალიფიცირა
