ბათუმის საკრებულოს სხდომა ტრადიციულად, ხმაურით დაიწყო, ოპოზიციისა და მმართველი გუნდის წარმომადგენლები ერთმანეთს სიტყვიერად დაუპირისპირდნენ. ყველაფერი მაშინ დაიწყო, როცა „ლელო-საქართველოს“ წევრი, ბათუმში დაკავებულ მოქალაქეებზე საუბრობდა. ვაჟა დარჩიას თქმით, სასამართლო და პროკურატურა „დანგრეული სისტემებია“.
დარჩიამ საკუთარ გამოცდილებაზე გაამახვილა ყურადღება და განაცხადა, რომ 11 იანვარს პოლიციის მიერ უკანონოდ დაიჭირეს, რამდენიმე საათი იზოლატორში გაატარა, სადაც საკუთარი თვალით დაინახა ძალადობა.
„რასაც აქ, წინა რეჟიმის დროს ვხედავდი, იმავე სცენარს ვუყურებ ახლა. პოლიციის მხრიდან ძალადობა და სასამართლოში სრული კომედია იყო“, – განაცხადა მან.
„მალე ოპოზიცია პარლამენტში შეცუნცულდება და მოსახლეობას რა თვალით შეხედავენ ვნახავთ. მე პირადად გავიცინებ“, – ასე უპასუხა “ქართული ოცნების“ წევრმა თენგიზ აფხაზავამ ვაჟა დარჩიას განცხადებას.
ვაჟა დარჩიამ საკრებულოს სხდომაზე მზია ამაღლობელის შიმშილობის ფაქტზეც გაამახვილა ყურადღება და კოლეგებს პოზიციის დაფიქსირებისკენ მოუწოდა. დარჩიამ “ბათუმელების” დამფუძნებელს სოლიდარობა გამოუცხადა. პოლიტიკური განცხადებების შემდეგ, ვაჟა დარჩიამ სხდომა დატოვა და განაცხადა, რომ აღარ მიიღებდა მონაწილეობას დღის წესრიგით გათვალისწინებულ საკითხებში.
ინფორმაციისთვის: ბათუმის საკრებულოს დღევანდელ სხდომას ოპოზიის წარმომადგენლები არ ესწრებოდნენ, ისინი ბოიკოტის რეჟიმში არიან.
https://www.facebook.com/ajaratimes/videos/624702270246318
