ბათუმის ნავთობტერმინალმა რვაწლიანი შესვენების შემდეგ საავიაციო ნავთის გადატვირთვა განაახლა. ამის შესახებ ტერმინალის მიერ გავრცელებულ განცხადებაშია ნათქვამი.
მათივე ინფორმაციით, 2026 წლის ივლისიდან ტერმინალი ევროპული ნავთობგადამამუშავებელი ქარხნების მიერ წარმოებული JET A1 მარკის საავიაციო ნავთის დამუშავებას ახორციელებს, რითაც გადასატვირთი ტვირთების ჩამონათვალი გაფართოვდა.
ბათუმის ნავთობტერმინალში საავიაციო ნავთის პირველი პარტია, 10 ათასი ტონა შავი ზღვის გავლით საზღვაო ტრანსპორტით შევიდა. ამჟამად ტვირთი ტერმინალში ინახება და ელოდება სარკინიგზო ვაგონ-ცისტერნებით ყაზახეთის მიმართულებით გაგზავნას.
განცხადებაში აღნიშნულია, რომ ბათუმის ნავთობტერმინალი ევროპიდან ყაზახეთში საავიაციო საწვავის მიწოდების ერთ-ერთ საკვანძო ლოგისტიკურ პუნქტად იქცა ტრანსკასპიური საერთაშორისო სატრანსპორტო მარშრუტის, ე.წ. შუა დერეფნის ფარგლებში.
ტერმინალის განმარტებით, JET A1 სამოქალაქო ავიაციაში გამოყენებული ერთ-ერთი ძირითადი საავიაციო საწვავია, ხოლო მისი გადატვირთვის განახლება ხელს შეუწყობს შუა დერეფნის განვითარებას, საერთაშორისო ლოგისტიკური ჯაჭვების გაძლიერებასა და სატრანზიტო შესაძლებლობების ზრდას.
ბათუმის ნავთობტერმინალი ნედლი ნავთობის, მაზუთის, დიზელის, საავტომობილო ბენზინის, სხვადასხვა მარკის ნავთის, გათხევადებული ნახშირწყალბადოვანი აირებისა და სხვა თხევადი ნავთობპროდუქტების გადატვირთვასაც უზრუნველყოფს.
ტერმინალის მონაცემებით, 2026 წლის პირველ ნახევარში ბათუმის ნავთობტერმინალში გადატვირთული თხევადი ნავთობტვირთების მოცულობამ დაახლოებით 725 ათასი ტონა შეადგინა.
