ბათუმში, ბაგრატიონის ქუჩაზე მცხოვრებლები მომიჯნავედ მიმდინარე მშენებლობის შეჩერებას ითხოვენ. მათი განცხადებით, №129-ში არსებული შენობის დემონტაჟისა და ახალი კორპუსის საძირკვლის მოსამზადებელი სამუშაოების დროს წარმოქმნილმა ვიბრაციამ საცხოვრებელი ბინის კედლები დააზიანა.
ადგილობრივების თქმით, ბოლო დღეებში კედლებზე არსებული ბზარები მნიშვნელოვნად გაიზარდა, რაც მათ უსაფრთხოების მხრივ სერიოზულ საფრთხედ მიაჩნიათ. მოსახლეობა ამბობს, რომ მძიმე ტექნიკის მუშაობისას ვიბრაცია მკაფიოდ იგრძნობა, რის გამოც შიშობენ, რომ დაზიანებები კიდევ უფრო გაღრმავდება.
მშენებლობის შეჩერების მოთხოვნით მოქალაქეებმა დღეს საპროტესტო აქცია გამართეს. აქციის მონაწილეებმა გარკვეული დროით მშენებლობის ტერიტორიაზე შესასვლელიც ჩაკეტეს. მათი განცხადებით, დახმარებისა და რეაგირების მოთხოვნით ბათუმის მერიასა და მუნიციპალურ ინსპექციას უკვე მიმართეს, თუმცა, როგორც ამბობენ, შესაბამისი უწყებების მხრიდან სათანადო რეაგირება არ მოჰყოლია.
ადგილობრივების ინფორმაციით, მუნიციპალურ ინსპექციაში განუმარტეს, რომ მშენებელ კომპანიას სანებართვო დოკუმენტაცია წესრიგში აქვს და ამ ეტაპზე მშენებლობის შეჩერების სამართლებრივი საფუძველი არ არსებობს. მოსახლეობამ უკვე დაიწყო ექსპერტიზის ჩატარების პროცესი, რათა დადგინდეს, უკავშირდება თუ არა კედლებზე გაჩენილი ბზარები მიმდინარე სამშენებლო სამუშაოებს. პარალელურად, ისინი სასამართლოში სარჩელის შეტანასაც გეგმავენ და მშენებლობის შეჩერებას სამართლებრივი გზით მოითხოვენ.
მშენებლობის ღირებულება თებერვალში შემცირდა, წლიურად კი ზრდა შენარჩუნდა – საქსტატი
