„საერთაშორისო გამჭვირვალობა საქართველოს“ კვლევის თანახმად, „ქართული ოცნების“ მთავრობის ინიციატივით პარლამენტი განიხილავს კანონპროექტს, რომელიც მინისტრების, მერებისა და სახელმწიფო რწმუნებულების მოადგილეებისთვის სახელფასო დანამატებისა და ფულადი ჯილდოების გაცემას ითვალისწინებს.
ორგანიზაციის შეფასებით, ეს მექანიზმი 2017 წელს სწორედ კორუფციული რისკების გამო გაუქმდა და მისი დაბრუნება „გაუმჭვირვალე და უკონტროლო ფინანსური სისტემის“ აღდგენას ნიშნავს.
კვლევის მიხედვით, კანონპროექტის ავტორები ცვლილებების აუცილებლობას თანამდებობის პირების „დაბალი ანაზღაურებით“ ხსნიან, თუმცა TI Georgia აღნიშნავს, რომ ბოლო ოთხ წელიწადში ამ პოზიციებზე ხელფასები მნიშვნელოვნად გაიზარდა. მაგალითად, თბილისის მერის მოადგილის სარგო 6 765 ლარიდან 9 840 ლარამდე გაიზარდა, რაც 46%-იან მატებას ნიშნავს. ორგანიზაცია ამ მონაცემს პენსიის ზრდას ადარებს და მიუთითებს, რომ ამავე პერიოდში 70 წლამდე მოქალაქეების პენსია მხოლოდ 42%-ით გაიზარდა.
კანონპროექტის მიხედვით, მინისტრებისა და მერების მოადგილეებს, ხელფასის გარდა, დამატებით პრემია-დანამატების მიღებაც შეეძლებათ.
TI Georgia-ს შეფასებით, ჯილდო-დანამატის სრულად ათვისების შემთხვევაში, თანამდებობის პირებს წელიწადში დამატებით 3.5 თვის ხელფასის შესაბამისი თანხა დაემატებათ. მაგალითად, თბილისის მერის მოადგილის ანაზღაურება 9 840 ლარიდან 12 792 ლარამდე გაიზრდება.
ორგანიზაციის განცხადებით, პრობლემურია ისიც, რომ პრემიისა და დანამატის გაცემის შესახებ გადაწყვეტილებას უშუალო ხელმძღვანელი ერთპიროვნულად მიიღებს, მკაფიო კრიტერიუმებისა და დამოუკიდებელი კონტროლის გარეშე.
„საერთაშორისო გამჭვირვალობა საქართველო“ აცხადებს, რომ ცვლილება ქმნის „პოლიტიკური ლოიალურობის ფინანსურად დაჯილდოების“ საფრთხეს და ეწინააღმდეგება იმ პრინციპებს, რის საფუძველზეც 2017 წელს პოლიტიკური თანამდებობის პირებისთვის პრემია-დანამატები აიკრძალა.
კვლევაში ყურადღება გამახვილებულია საერთაშორისო პრაქტიკაზეც. ორგანიზაციის შეფასებით, კანონპროექტის განმარტებით ბარათში მოყვანილი დასავლური მაგალითები არასწორად არის ინტერპრეტირებული, რადგან სხვადასხვა ქვეყნებში ანაზღაურების დამატებითი მექანიზმები მკაცრი წესებით, გამჭვირვალე კრიტერიუმებითა და დამოუკიდებელი კონტროლის პირობებში მოქმედებს.
TI Georgia ასევე მიუთითებს, რომ კანონპროექტი არ შეიცავს ანტიკორუფციულ მექანიზმებს. კერძოდ, არ არის განსაზღვრული, რა პირობებში გაიცემა დანამატი, არ არსებობს სავალდებულო საჯაროობა და არც დამოუკიდებელი მონიტორინგის სისტემა.
ორგანიზაციის დასკვნით, ინიციატივა ფაქტობრივად აღადგენს იმ პრაქტიკას, რომელიც 2017 წელს კორუფციის რისკების გამო გაუქმდა და ახალ საფრთხეებს ქმნის საჯარო ფინანსების გამჭვირვალობის მიმართულებით.
რამდენი ლარი მოხმარდა საჯარო მოხელეების ხელფასებს აჭარის ბიუჯეტიდან
აჭარის უმაღლესი საბჭოს პასიური წევრების ანაზღაურებასა და მივლინებაში 156 910 ₾ დაიხარჯა – კვლევა
