უნივერსალური ცოდნის აკადემია UNIKO-ს მოსწავლეებისთვის ბათუმის ლანდშაფტური დაგეგმარებისა და გამწვანების სამსახურმა, მწვანე მეგობრობის კამპანიის ფარგლებში, ცნობიერების ამაღლების, შემეცნებითი ღონისძიება მოაწყო.
ახალგაზრდებმა სათბურში მოინახულეს თესლების გამოსაყვანი მანქანა-დანადგარები, ასევე, ისინი გაეცნენ ყვავილებისა და ხე-მცენარებიის გამრავლებისა და დარგვის მეთოდს.
,,აკადემია UNIKO წლებია, რაც უამრავ ახალგაზრდას ლანდშაფტის დიზაინს ასწავლის. დღეს ჩვენმა კურსდამთავრებულებმა კიდევ უფრო სიღრმისეულად გაიაზრეს თუ რამდენად დასაქმებადი, მოთხოვნადი და აქტუალურია ეს პროფესიები, ასევე გამოთქვეს სურვილი მოხალისეობრივად ჩაერთონ მიმდინარე პროექტებში და მონაწილეობა მიიღონ ბათუმის კიდევ უფრო გალამაზებასა და გამწვანებაში”- მზია მამაგულაშვილი, აკადემია UNIKO-ს დამფუძნებელი და დირექტორი.
სასათბურე ტურის შემდეგ, ღონისძიების მონაწილეებმა ცენტრალურ პარკში გადაინაცვლეს, სადაც დაათვალიერეს ტურისტული არქიტექტურა და ინფრასტრუქტურა, გაეცნენ ბაღის მოვლის სპეციფიკასა და პროფესია მებაღეობას. შეხვდნენ წარმატებულ აგრონომს, ლანდშაფტის დიზაინერს.
,,16 წელია ამ სფეროში ვარ და როდესაც ვუყურებ ჩემს მიერ დარგული, პატარა ნერგები როგორ იზრდება სულ სხვანაირი სიყვარული და განცდა მეუფლება. შუა ღამეს გამოვსულვარ ყინვაში, მცენარეებისთვის ფოთლებიდან თოვლი გადმომიფერთხავს, რათა სიმძიმისგან ტოტები არ დამტვრეოდა. თითოეული ხე საკუთარი შვილებივით მიყვარს”- მამუკა საფარიძე, მებაღე.
