“ყველა სიტყვა, რაც ეხებოდა ჩვენი მთის პერსპექტივას, გოდერძისა და ბეშუმის განვითარებას, ყველა სიტყვა შესრულებულია,” – განაცხადა აჭარის მთავრობის თავმჯდომარემ ბეშუმში სტუმრობისას. სახალხო დღესასწაულზე სიტყვით გამოსვლისას თორნიკე რიჟვაძემ ასევე, აღნიშნა, რომ “კიდევ ბევრ საქვეყნო საქმეს გააკეთებენ”.
სცენაზე სიტყვით გამოსვლის შემდეგ თორნიკე რიჟვაძემ მედიასთან კომენტარი არ გააკეთა, არადა გვსურდა დაეკონკრეტებინა რას გულისხმობდა როცა ხალხზე ზრუნვასა და განვითარებაზე საუბრობდა.
აჭარის მთავრობის თავჯმდომარის მაღალფარდოვანი სიტყვების მიღმა, მთაში რეალობა სხვაგვარია. ამ დრომდე არ დასრულებულა ხულო-ზარზმის დამაკავშირებელი გზის მშენებლობა. მოასფალტების პირობას “ოცნება” 12 წელია დებს. ბოლო, ტრადიციული დაპირება პრემიერ-მინისტრს, ირაკლი კობახიძეს ეკუთვნის. მისი თქმით, პროექტი 2024 წლის ბოლომდე დასრულდება.
ბეშუმამდე მისასვლელი გზა ერთადერთი პრობლემა არაა. ხალხმრავლობით გამორთეულ კურორტს ელექტროენერგია მცირე დროით მიეწოდება. ამ დრომდე არ მომხდარა აბონენტების გამრიცხველიანება. ადგილობრივთა თქმით, პრობლემაა დაურეგისტრირებელი სახლებიც.
“ადგილობრივები და დამსვენებლებიც უამრავ პრობლემას აწყდებიან. 2 კვირაა, რაც ბეშუმში ვარ, ყოველდღიურად საათობით გვეზღუდება ელექტროენერგია. მოსახლეობა წუხს შუქის არ ქონის გამო, რადგან მთაში ცივა და არ გვაქვს გათბობა. შუქის გაუმართაობა წლებია პრობლემურია. მოსახლეობის უმეტესობას არ აქვს დარეგისტრურებული სახლი. აბონენტის არ ასებობის გამო, არ არსებობს გამრიცხველიანება, რის გამოც დამსვენებელს უწევს მერიისგან დაწესებული სავალდებულო 90 ლარის გადახდა,” – ამბობს ერთ-ერთი ადგილობრივი თომა აბულაძე.
როდის მოგვარდება ბეშუმში არსებული პრობლემები სრულყოფილად ან რა მიმართულებით მუშაობენ ამ ეტაპზე – კითხვებზე ხულოს მერიაში არ გვიპასუხეს.
“ენერგო პრო ჯორჯიაში” კი ელექტროენერგიის შეფერხების მიზეზებს ხსნიან და აცხადებენ, რომ ხარვეზის აღმოსაფხვრელად მუშაობენ.
,,ენერგო-პრო ჯორჯიასთვის, ბეშუმსა და მიმდებარე კურორტებზე ელ.ენერგიის რამდენჯერმე წყვეტის შესახებ ინფორმაცია ცნობილია. ავარიულ გათიშვებს ერთ-ერთი მთის ელ.გადამცემი ხაზი იწვევდა, რომელიც მერიის ბალანსზეა. ამ დროისთვის ენერგო-პრო ჯორჯიას ტექნიკური ჯგუფები მუშაობენ აღნიშნული მიმართულებით, რაც ავარიულ შემთხვევებს მინიმუმამდე დაიყვანს,” – აცხადებენ კომპანიაში.
აქვე დაგაინტერესებთ ⇓
- ხულოში საბაგირო გაურკვეველი ვადით შეჩერდა
- ხულოს მუნიციპალიტეტში უკანონო მშენებლობის 24 ფაქტი გამოვლინდა
- აჭარის მუნიციპალიტეტებში სასმელი წყალი დაბინძურებულია
- მაღალმთიან აჭარაში უფასო სასადილოთი 120 ადამიანი სარგებლობს
