არჩევნებამდე რამდენიმე დღით ადრე ქობულეთის მერიამ პედაგოგებს 150 ლარიანი ვაუჩერები, ყვავილები და შოკოლადები აჩუქა. მასწავლებლის დღისადმი მიძღვნილი ღონისძიების ორგანიზებაში მუნიციპალიტეტმა 18 ათას 105 ₾არი დახარჯა.
სატენდერო დოკუმენტაციის თანახმად, 23 მასწავლებელს პარფიუმერული მაღაზიის სასაჩუქრე 150 ლარიანი ვაუჩერი გადასცეს, 30 პედაგოგს ყვავილი, ხოლო 5-ს ტკბილეულის კალათა. ღონისძიებას ადგილობრივი ხელისუფლების წარმომადგენლები, აჭარის განათლების მინისტრი და “ქართული ოცნების” დელეგატები ესწრებოდნენ.
ღონისძიების ფარგლებში ადგილობრივი მომღერლების მონაწილეობით კონცერტი გაიმართა, დასასრულს კი 57 კაცზე სუფრა გაიშალა, რისთვისაც ბიუჯეტიდან 5 700 ₾არი იყო გათვალისწინებული.
ქობულეთის მერიაში განმარტავენ, რომ ტრადიციული ღონისძიება არ შეიძლება აღიქმებოდეს, როგორც წინასაარჩევნოდ ამომრჩეველთა მოსყიდვის მცდელობად.
“ოქტომბერი მასწავლებლის თვედ არის გამოცხადებული. ჩვენს მუნიციპალიტეტში ამ ღონისძიებას აქვს ტრადიციული სახე და აღინიშნება სხვადასხვა აქტივობით. ბიუჯეტი იგივე იყო, რაც გასულ წლებში. ეს ღონისძება ემსახურება პედაგოგთა შრომის დაფასებასა და მათი მოტივაციის ამაღლებას. ცნობილია, რომ ოქტომბრის თვე ზოგადად არის საარჩევნო პერიოდი, ბოლო წლებში ყველა არჩევნები თითქმის ოქტომბერში გაიმართა. რამდენიმე ღონისძიება, რა შესაძლებლობასაც გვქონდა გადავდეთ, რადგან არჩევნები არ გადაეჩრდილა, ან რაიმე სახის კითხვები არ გაჩენილიყო. ეს შეხვედრა არ ვფიქრობ რომ წინასარჩევნო მიზნებისთვის იქნებოდა გამოყენებული, რადგან ეს შეკრება ვიმეორებ, ტრადიციულად ტარდება,” – განაცხადა ჩვენთან საუბრისას ნათია ნიჟარაძემ, რომელიც ქობულეთის მერიის განათლების, კულტურის, სპორტის, ახალგაზრდობისა და გენდერული თანასწორობის სამსახურის უფროსია.
აქვე დაგაინტერესებთ ⇓
- ღონისძიებები შენობის რეაბილიტაციის პარალელურად – ქობულეთის კულტურის სახლის რემონტს ვერ ასრულებენ
- „რომელი მშობელი ამბობს ამას, მობრძანდეს და დაგვიპირისპირდეს“ – ქობულეთის ბაღებში თანხის შეგროვების შესაძლო ფაქტს უარყოფენ
